धाराशिव, दि. १ सप्टेंबर : शिक्षण पूर्ण झाले, कौशल्यही आत्मसात केले; मात्र पात्रतेनुसार योग्य रोजगाराची संधी कुठे मिळणार, कोणत्या उद्योगात आपल्या कौशल्याला वाव मिळेल आणि थेट रोजगारदात्यांपर्यंत पोहोचायचे कसे, या प्रश्नांनी नोकरीच्या शोधात असलेली तरुणाई अनेकदा संभ्रमात असते. या पार्श्वभूमीवर धाराशिव जिल्ह्यातील युवक-युवतींसाठी रोजगाराची नवी दारे खुली करणारा ‘रोजगार महाकुंभ’ अर्थात पंडित दीनदयाळ उपाध्याय रोजगार मेळावा आयोजित करण्यात आला आहे. हा रोजगार मेळावा मंगळवार, दि. २९ सप्टेंबर २०२६ रोजी होणार आहे.
जिल्ह्यातील अधिकाधिक पात्र युवक-युवतींना त्यांच्या शैक्षणिक पात्रता, कौशल्य आणि क्षमतेनुसार रोजगाराच्या संधी उपलब्ध करून देणे, हा या उपक्रमामागील प्रमुख उद्देश आहे. जिल्हा कौशल्य विकास, रोजगार व उद्योजकता मार्गदर्शन केंद्र, धाराशिव आणि जिल्ह्यातील विविध आस्थापनांच्या संयुक्त विद्यमाने या रोजगार महाकुंभाचे आयोजन करण्यात आले आहे.
रोजगारदाते आणि उमेदवार एकाच व्यासपीठावर
हा उपक्रम केवळ पारंपरिक रोजगार मेळाव्यापुरता मर्यादित नसून उद्योग, विविध आस्थापना, रोजगारदाते, कौशल्य प्रशिक्षण संस्था आणि रोजगाराच्या प्रतीक्षेत असलेले उमेदवार यांना एका प्रभावी व्यासपीठावर आणण्याचा प्रयत्न आहे. त्यामुळे पात्र उमेदवारांना थेट रोजगाराच्या संधी मिळण्याबरोबरच उद्योगांना त्यांच्या आवश्यकतेनुसार प्रशिक्षित व सक्षम मनुष्यबळ उपलब्ध करून घेणे शक्य होणार आहे.
शिक्षण आणि कौशल्य असूनही रोजगाराची योग्य संधी न मिळणाऱ्या युवक-युवतींची संख्या मोठी आहे. दुसरीकडे अनेक उद्योग आणि व्यावसायिक आस्थापनांना आवश्यकतेनुसार पात्र व प्रशिक्षित मनुष्यबळ मिळण्यात अडचणी येतात. या दोन्ही घटकांमधील दरी कमी करण्याचे काम रोजगार महाकुंभाच्या माध्यमातून होणार आहे.
उद्योगांकडून रिक्त पदांची माहिती मागविली
रोजगार महाकुंभात जिल्ह्यातील अधिकाधिक उद्योग, आस्थापना आणि व्यावसायिक संस्थांचा सहभाग वाढविण्यावर भर देण्यात आला आहे. विविध उद्योग समूह, आस्थापना आणि व्यावसायिक संस्थांकडे उपलब्ध असलेल्या पुरुष व महिलांसाठीच्या रिक्त पदांची माहिती जिल्हा कौशल्य विकास, रोजगार व उद्योजकता मार्गदर्शन केंद्राकडे सादर करण्याचे आवाहन करण्यात आले आहे.
संबंधित उद्योग व आस्थापनांनी त्यांच्याकडील रिक्त पदांची माहिती दिलेल्या गुगल फॉर्मद्वारे भरून द्यावी, तसेच विहित नमुन्यात आवश्यक माहिती संबंधित कार्यालयास सादर करावी, असे आवाहन करण्यात आले आहे. रिक्त पदांची अचूक माहिती उपलब्ध झाल्यास रोजगार महाकुंभात सहभागी होणाऱ्या उमेदवारांना त्यांच्या पात्रता व कौशल्यानुसार योग्य संधी उपलब्ध करून देणे अधिक सुलभ होणार आहे.
युवकांनी संधीचा लाभ घ्यावा
धाराशिवसारख्या जिल्ह्यात स्थानिक पातळीवर रोजगाराच्या संधी निर्माण होणे आणि त्या संधींपर्यंत तरुणाईला थेट पोहोचता येणे, ही काळाची गरज आहे. रोजगारासाठी मोठ्या शहरांकडे स्थलांतर करण्याची वेळ येऊ नये, यासाठी स्थानिक उद्योग आणि रोजगाराच्या उपलब्ध संधी यांच्यात समन्वय निर्माण करणे आवश्यक आहे. रोजगार महाकुंभ हा त्या दिशेने महत्त्वपूर्ण उपक्रम ठरू शकतो.
२९ सप्टेंबर रोजी होणाऱ्या या रोजगार महाकुंभातून जिल्ह्यातील नोकरीच्या शोधात असलेल्या युवक-युवतींना करिअरची नवी दिशा मिळण्याची अपेक्षा आहे. त्यामुळे पात्र उमेदवारांनी या संधीचा लाभ घ्यावा, तसेच जिल्ह्यातील उद्योग, आस्थापना आणि व्यावसायिक संस्थांनी मोठ्या संख्येने सहभागी होऊन उपलब्ध रिक्त पदांची माहिती सादर करावी, असे आवाहन धाराशिव येथील जिल्हा कौशल्य विकास, रोजगार व उद्योजकता मार्गदर्शन केंद्राच्या सहायक आयुक्तांनी केले आहे.
