उद्धव ठाकरे यांच्या उपस्थितीत पक्षप्रवेश; आगामी निवडणुकांच्या पार्श्वभूमीवर राजकीय समीकरणांना नवे वळण
धाराशिव : धाराशिवच्या राजकीय वर्तुळात महत्त्वपूर्ण घडामोड घडली असून संजय निंबाळकर आणि रामेश्वर शेटे यांनी शिवसेना (उद्धव बाळासाहेब ठाकरे) पक्षात जाहीर प्रवेश केला. पक्षप्रमुख उद्धव ठाकरे यांच्या उपस्थितीत हा पक्षप्रवेश पार पडला.
यावेळी उद्धव ठाकरे यांनी निंबाळकर आणि शेटे यांचे पक्षात स्वागत केले. पक्षाचे पदाधिकारी व कार्यकर्ते मोठ्या संख्येने उपस्थित होते. पक्षप्रवेशामुळे कार्यकर्त्यांमध्ये उत्साहाचे वातावरण निर्माण झाले.
संजय निंबाळकर आणि रामेश्वर शेटे यांच्या प्रवेशामुळे ठाकरे गटाला धाराशिवमध्ये स्थानिक पातळीवर संघटनात्मक बळ मिळण्याची अपेक्षा व्यक्त केली जात आहे. आगामी स्थानिक स्वराज्य संस्थांच्या निवडणुकांच्या पार्श्वभूमीवर या प्रवेशाकडे राजकीयदृष्ट्या महत्त्वपूर्ण घडामोड म्हणून पाहिले जात आहे.
या पक्षप्रवेशामुळे धाराशिवमधील विद्यमान राजकीय समीकरणांवर काय परिणाम होणार, कोणत्या नेत्यांच्या राजकीय वाटचालीवर त्याचा प्रभाव पडणार आणि आगामी निवडणुकांमध्ये याचे प्रतिबिंब कशा पद्धतीने उमटणार, याकडे आता राजकीय वर्तुळाचे लक्ष लागले आहे.
दरम्यान, पक्षाची संघटनात्मक ताकद वाढविण्यासाठी आणि आगामी काळात पक्षविस्तार करण्यासाठी एकजुटीने काम करण्याचा निर्धार यावेळी उपस्थित कार्यकर्त्यांनी व्यक्त केला.
संजय निंबाळकर आणि रामेश्वर शेटे यांच्या प्रवेशामुळे धाराशिवच्या राजकारणात ठाकरे गटाची नवी राजकीय खेळी सुरू झाल्याची चर्चा रंगू लागली आहे.
