धाराशिव : धाराशिव नगरपरिषदेच्या राजकारणात गेल्या काही दिवसांपासून सुरू असलेल्या राजकीय घडामोडींना आता नवा ट्विस्ट मिळाल्याची चर्चा आहे. पक्षबदलाच्या चर्चेत असलेले काही नगरसेवक सोलापूर-पुणे मार्गावरून पुन्हा धाराशिवच्या दिशेने परतल्याची चर्चा राजकीय वर्तुळात रंगली आहे. त्यामुळे नगरसेवकांच्या संभाव्य पक्षप्रवेशाच्या चर्चेला तूर्तास ब्रेक लागल्याचे बोलले जात आहे.
दरम्यान, या घडामोडीनंतर ‘तू निष्ठावंत की मी निष्ठावंत?’ असा सवाल करत नगरसेवकांमध्येच राजकीय श्रेयवाद सुरू झाल्याची चर्चा आहे. कोण पक्षासोबत खंबीरपणे उभे राहिले आणि कोणत्या क्षणी कोणाची भूमिका बदलली, यावरून अंतर्गत राजकीय वातावरण तापल्याचे बोलले जात आहे.
उपनगराध्यक्षांच्या भूमिकेचीही चर्चा
या सगळ्या राजकीय घडामोडींमध्ये नगरपरिषदेच्या उपनगराध्यक्षांची नाराजीही चर्चेचा विषय ठरत आहे. ‘गटात माझं पद काढू नका’ अशी भूमिका त्यांनी घेतल्याची चर्चा असून, पद आणि राजकीय अस्तित्व टिकवण्यासाठी अंतर्गत पातळीवर हालचाली सुरू असल्याचे बोलले जात आहे.
नगरपरिषदेतील आगामी राजकीय समीकरणे लक्षात घेता पदाधिकारी, नगरसेवक आणि विविध गटांची भूमिका महत्त्वाची ठरणार आहे. कोण कोणासोबत राहणार आणि कोणता गट कोणाच्या नेतृत्वाखाली पुढील राजकीय वाटचाल करणार, याकडे आता धाराशिवकरांचे लक्ष लागले आहे.
परतीच्या फेरीने वाढवली उत्सुकता
मुंबईकडे जाण्याची चर्चा असलेली राजकीय गाडी सोलापूर-पुणे रस्त्यावरून पुन्हा धाराशिवकडे वळल्याची चर्चा सध्या सोशल आणि राजकीय वर्तुळात रंगली आहे. मात्र, या घडामोडींमागील नेमके कारण अद्याप स्पष्ट झालेले नाही.
पक्षनिष्ठा, पद आणि आगामी राजकीय समीकरणे—या तीन मुद्द्यांभोवती धाराशिव नगरपरिषदेचे राजकारण सध्या फिरताना दिसत आहे. येत्या काळात संबंधित नगरसेवक आणि पदाधिकाऱ्यांची अधिकृत भूमिका समोर आल्यानंतर या राजकीय नाट्याचे खरे चित्र स्पष्ट होण्याची शक्यता आहे.
